நீர்கொழும்பு சிறைச்சாலையில் இடம்பெற்ற மோதலின் போது உயிரிழந்த 08 சிறைச்சாலை அதிகாரிகளுக்கு உடனடியாக அமுலுக்கு வரும் வகையில் பதவி உயர்வு மற்றும் நஷ்டஈடு வழங்கப்பட்டுள்ளதாக சிறைச்சாலைகள் ஊடகப் பேச்சாளர் ஏ.சி. கஜநாயக்க தெரிவித்துள்ளார்.
இதன்படி, கடமையின் போது உயிரிழந்த சிறைச்சாலை அதிகாரி எஸ்.எச். சந்திரவன்ச, இரண்டாம் தரத்திலிருந்து முதலாம் தரத்திற்குப் பதவி உயர்த்தப்பட்டுள்ளார்.
அத்துடன், உயிரிழந்த சிறைச்சாலை பாதுகாவலர்களான எஸ்.டி. அபேவர்தன, பி.என். தரங்க, ஏ.டி. தரங்க, டி.டபிள்யூ. புஷ்பகுமார, ஆர்.ஆர். சஞ்சீவ, டி.ஆர். திலகசிறி மற்றும் எம்.ஜி. உபாலி ஆகியோர் சிறைச்சாலை சார்ஜன்ட் தரத்திற்குப் பதவி உயர்த்தப்பட்டுள்ளனர்.
இந்த பதவி உயர்வுகள் அவர்கள் உயிரிழந்த தினத்திலிருந்து அமுலுக்கு வரும் வகையில் வழங்கப்பட்டுள்ளதுடன், அவர்களது குடும்பத்தினருக்கு நீதி அமைச்சினால் தலா 05 இலட்சம் ரூபா நஷ்டஈடு வழங்கப்பட்டுள்ளதாக அவர் மேலும் தெரிவித்தார்.
நீர்கொழும்பு சிறைச்சாலை மோதல் குறித்த பிரேத பரிசோதனைகளில், 14 கைதிகள் துப்பாக்கிச் சூட்டினாலும், 09 கைதிகள் தாக்குதல்களினாலும் உயிரிழந்துள்ளமை உறுதிப்படுத்தப்பட்டுள்ளது.
உயிரிழந்த 24 பேரின் மரண விசாரணை சாட்சியங்கள் நேற்றுடன் நிறைவடைந்தன. மேலும், உயிரிழந்த சிறைச்சாலை அதிகாரிகள் மிகவும் கொடூரமான முறையில் படுகொலை செய்யப்பட்டுள்ளமை பிரேத பரிசோதனைகள் மூலம் தெரியவந்துள்ளது.
இந்தச் சம்பவம் தொடர்பான மேலதிக விசாரணைகளை நீர்கொழும்பு தலைமையகக் காவல்துறையிடமிருந்து பெற்று, குற்றப்புலனாய்வுத் திணைக்களத்திடம் ஒப்படைக்குமாறு நீர்கொழும்பு பிரதான நீதவான் ஷிலானி பெரேரா நேற்று உத்தரவிட்டார்.
போதைப்பொருள் கடத்தல் குறித்த தகவலை வழங்கியமை தொடர்பில் கைதிகளுக்கிடையில் ஏற்பட்ட இந்த மோதலில், சிறைச்சாலை அதிகாரிகள் 08 பேர் மற்றும் கைதிகள் 21 பேர் என மொத்தம் 29 பேர் உயிரிழந்தனர்.
மேலும், 100க்கும் மேற்பட்டோர் காயமடைந்தமை குறிப்பிடத்தக்கது.
